Beledweyne,(insidesomalia.org)- Ciidamo Itoobiyaan ah kuwii ugu badnaa abid ayaa xalay ilaa saaka soo galay gudaha Magalaada B/weyne, kuwaasoo howl-galo aan la fileynin ka sameeyay gudaha Magaalada.

Ciidamadan oo watay qalab isugu jiro hub iyo alaabaha caadiga ah ee Jooradiyo iyo Maacuun iyo sidoo kale xaasaskooda ayaa waxaa ay degeen xarunta Maamulka waxaana loo maleeyayaa in ay fariisin ka sameysanayaan sida muuqato.

Waana markii ugu horeysay ay Ciidamada Itoobiya fariisin ka sameysataan gudaha Magaalada B/weyne ilaa iyo haatana lama garanayo wax keenay in ay fariisin ka sameystaan Magaalada.

Ciidamadan oo xalay ilaa saakay ku soo qulqulayay gudaha Magaalada B/weyne ayaa waxaa ay saaka holw-galkii ugu horeeyay ee ay sameeyeen ku soo qabqabteen ilaa 15 wadaada tabliiqa, kuwaasoo ku sugnaa Masjid ku yaalo Xaafada Irid-aamin xarunta Iskuulka Mujamac dhiiba ee gudaha Magaalada B/weyne.

Qabashada Culumaa'udiinkan tabliiqa ah ayaa la'ogyen waxa keenay xiligani walow baryihii ugu dambeeyay ee ay soo galayeen Ciidamada Itoobiyaanka gudaha Magalaada sida la sheegay ay ka eegayeen wadaadan.

Dadka magaalada B/weyne ayaa aad uga xumaaday qabashada wadaadan tabliiqa ah, iyagoo markii ay maqleen qabashadooda ay ku soo dhacday xasuuqii Masjidka Al-Hidaaye ee Degmada Hilwaa ee Magaalada Muqdisho loogu geystay wadaado tabliiq ah, islamarkaana ay geysteen Ciidamada wadanka Itoobiya ee ku sugan Magaalada Muqdisho.

Xarigan loo geystay wadaadan tabliiqa ayaa waxaa ay ku soo beegmeysaa xili wax Maamul ah oo ka taliyo aysan jirin Magaalada B/weyne, islamarkaan la sugayo in uu imaado Gudoomiyaha cusub ee Gobolka Hiiraan,kaas oo dhawaan uu u magacaabay Reysul Wasaaraha Dowladda Federaalka KMG ah ee Soomaaliya.